Collectif Prouvènço - Uno regioun uno identita uno lengo

Marsiho, vilo capitalo pèr la telo en 2020 - MDP 68

pèr l’Europo, l’Africo, l’Asìo e l’Ouriènt-Mejan

D 30 juillet 2020     H 11:59     A La Chourmo dóu Couleitiéu    


agrandir

Dificile de se l’imagina, mai, se poudian vèire, vertadié, Internet - la telaragno vo la telo - tau coume un païs, sarié lou tresen mai gros counsoumatour d’energìo de la planeto just darrié lis Estat-Uni e la Chino !

Es qu’aquelo telo, se n’en rendèn pas toujour bèn comte, pèr pousqué marcha, a besoun d’infrastruturo gigantasso : proumié, de cable souto-marin, que tiron de long, dins li mar, de mai de 32 cop lou tour de la terro, pièi de data centers pèr counserva tóuti nòsti dounado, enfin de servèire à bóudre, pèr milioun. Sèmblo pas de crèire mai 99 dóu cènt de nòsti escàmbi virtuau passon pèr li cable souto-marin, 1 dóu cènt soulamen pèr li satelite dóu debit trop mouligas e que coston trop !
Aquéli cable de coummunication, d’en proumié istala pèr lis ouperatour naciounau, soun majamen vuei l’afaire di GAFAM (Google, Apple, Facebook, Amazon e Microsoft) que tènon mai de 50 dóu cènt dóu marcat (se saup adeja que n’auran segur mai de 90 dóu cènt en 2025). E pèr ço qu’es di data centers ? Nourmalamen, aquéli bastisso grandarasso, ounte soun garda tant li servèire que li dounado enfourmatico, soun en liame emé li gràndi capitalo : Loundro, Madrid, Paris, Estockolm, Amsterdam, Brussello, Vieno... Alor de que vèn faire Marsiho aqui dedins ?
Se saup que Marsiho es adeja la capitalo dóu baloun e de la petanco, mai aro es à mand de veni uno vilo capitalo pèr la telo. E vo ! Escoutas un pau…
A la seguido de roumpaduro, de cambiamen e d’evoulun dins li teinoulougìo, Marsiho es vengudo, dins mens de cinq an de tèms, un rode estrategi dins aquelo batèsto pèr basti lis usage numerique di particulié e dis entreprèsso de deman.

La ciéuta fouceienco « gate way » dóu numerique

Es aqui meme au cor de la ciéuta fouceienco qu’arribon 14 cable souto-marin de coumunicacioun que permèton d’acamina lis infourmacioun de la telo tout à l’entour de la Mieterrano e meme enjusqu’au Mejan-Ouriènt e en Asìo. Vesès que lis atous de la vilo soun vengu counsiderable e, sus un plan geougrafi, d’uno impourtanco estrategico que tóuti an bèn vist. Marsiho es vuei lou 10en nous moundiau de councentracioun de maiun e d’escàmbi de dounado pèr lou net : pèr aqui passon li dounado pèr l’Europo, l’Africo, l’Asìo e lou Mejan-Ouriènt. E a pas fini de se desplega…

Noum de code : MRS3 – « Martha »

Es la soucieta Interxion, un hub d’intercounneicioun que counèis bèn la vilo qu’a deja planta caviho à la Joulieto (MRS1) e proche la porto 4 dóu port (MRS2) qu’es en cargo d’aqueste proujèt nouvèu (MRS3) que se desplegara dins « Martha ». De qu’es acò, « Martha » ? Eh bèn, que lou vougues crèire o noun, es dins un ancian bunker, un blockhaus de 251 mètre de long pèr 45 de large dóu port, basti pèr lis Alemand en 1943 pèr i’empega si souto-marin, que se fara MRS3. Un bunker que lis Alia que desbarquèron en avoust 1944 leissèron pas lou tèms i Alemand de l’acaba en plen.
Long-tèms serviguè de reservo pèr l’armado pièi pèr li douano avans de se vèire abandouna. Fai d’annado que l’Estat e lou GPPM (Grand Port Maritime de Marsiho) n’en sabien que faire.
Interxion a trouba aqui un rode astra proche tant de la vilo que dóu port (sian à 3 km tant dóu Port-Vièi d’un coustat que de l’Estaco, de l’autro) ounte arribon li cable souto-marin de coumunicacioun. Coume lou poudès vèire, saran pas esquicha aqui dedins acò, es segur ! I’a faugu faire, de segur, d’obro impourtanto pèr pimpa lou liò e lou metre i normo. Acò es fa aro, e li proumièri pratico que poudrien èstre Netflix, Apple o Microsoft soun esperado dins aqueste liò securisa que noun sai, tre la debuto de 2020. A l’ouro que sian tóuti apetega à coumunica pèr la telo, vesès bèn quant Marsiho s’amerito bèn - en demai dis àutri titre -, lou de vilo capitalo pèr la telo ! E n’en poudèn belèu encaro mai cuba l’impourtanço dins la pountannado de mudamen fourça de nòsti biais de viéure ’mé la guerro baterioulougico ounte sian encuei. Embarra dins nòstis oustau, poudèn pamens resta dubert sus lou mounde bono-di prougrès teini que nous baio lou numerique.

Natalìo Seisson

Cet article a été inspiré par l’émission radiophonique de France Culture, « La tuyauterie d’internet ». Remerciements à la société Interxion pour les illustrations.

Article publié en provençal maritime dans le magazine Me Dison Prouvènço n°68.

Cet article est consultable en version PDF :

PDF - 337.1 ko