Collectif Prouvènço - Uno regioun uno identita uno lengo
Vous êtes ici : Accueil » Le site web » Actualités » Nous a quita... Jean Mathieu

Nous a quita... Jean Mathieu

D 7 octobre 2014     H 11:15     A La Chourmo dóu Couleitiéu     C 0 messages


agrandir

Jean Mathieu
Président d’honneur de l’amicale des gardians de métier.

Es lou dimars 30 de setèmbre passa que s’amoussè, dins soun oustau de Sant-Laurèns d’Aigouso, Jan Matiéu, qu’avié 66 an. Ancian poumpié de la Vilo de Paris, Jan Matiéu, un cop la retirado vengudo, avié pouscu reveni dins soun terraire gardounen pèr faire lou mestié que l’avié sèmpre atriva : èstre gardian de biòu. Lou faguè encò de manadié autant famous qu’Aubanèu-Barouncèlli, Roubert Margé o Glaude Saumado. Ajudè pièi lou jouine Renaud Vinuela à mounta sa manado. Prenguè talamen d’aflat dins lou pichot mounde de la bouvino que fuguè, proun de tèms, presidènt de l’assouciacioun di gardian de mestié avans que d’en èstre soun presidènt d’ounour. Ero, de-bon, uno figuro quasimen tutelàri pèr si coulègo gardian e sis ami afeciouna, emé soun imour pessuguet e rebroussié, mai tambèn sa grando bounta e soun umanita. Mumbre dóu gouvèr de la Counfrarié di Gardian de Sant-Jòrgi, fuguè l’un di cepoun di fèsto que marquèron lou 500en centenàri qu’aquest antique groupamen proufessiounau, en coumpagno de soun ami lou manadié craven Frederi Lescot, e de sis àutri cardacho gardo-bèstio. Es éu que faguè lou laus d’Ubert Ióunet, i’a gaire, avans que la malastrado faguèsse qu’éu meme fuguèsse pounchouna pèr la mort, en quàuqui semano...

Apoundren que Jan Matiéu èro un Prouvençau de la grand saco que parlavo la lengo, e qu’èro un ami de noste Couleitiéu Prouvènço. Fuguè acoumpagna à soun cros pèr sis ami, tras qu’esmougu, lou 2 d’óutobre passa - manadié, gardian, rasetaire, elegi, arleso afeciouna di biòu, etc... En particulié, lou moulounas de gènt que i’èron presènt gardaran memòri emé grando emoucioun de la dicho qu’alor faguè soun amigo Astrid Giraud, anciano rèino d’Arle, acoumpagnado pèr la rèino de vuei, Mandy Graillon, e si damisello d’ounour.
A sa maire Nicolo, à soun fraire Danis em’à si dos neço, que Jan lis afeciounè tant à pourta lou tignoun arlaten, lou Couleitiéu Prouvènço mando si coumplancho entristesido...